ಶ್ರೀ ವಾಮನ ಪುರಾಣ ಪ್ರವಚನ

ವಿಷ್ಣುಪ್ರೀತ್ಯರ್ಥವಾಗಿ ಮಾಡುವ ಹಲವು ವ್ರತಗಳಲ್ಲಿ ಪಯೋವ್ರತವೂ ಒಂದು. ಫಾಲ್ಗುಣಮಾಸದ ಶುಕ್ಲ ಪ್ರತಿಪದೆಯಿಂದ ಪ್ರಾರಂಭಿಸಿ ದ್ವಾದಶಿಯವರೆಗೆ ಇದನ್ನು ಆಚರಿಸಬೇಕು. ಈ ಅವಧಿಯಲ್ಲಿ ವಿಷ್ಣುವಿಗೆ ಅರ್ಪಿತವಾದ ಹಾಲನ್ನು ಒಂದು ಲೋಟದಷ್ಟು ಮಾತ್ರವೇ ಸೇವಿಸಿ ಶ್ರೀವಿಷ್ಣುಚಿಂತನೆ, ಶ್ರೀವಿಷ್ಣುಸರ್ವೋತ್ತಮತ್ವವನ್ನು ಪ್ರತಿಪಾದಿಸುವ ಸದ್ಗ್ರಂಥಗಳ ಪಠಣದ / ಶ್ರವಣದಲ್ಲಿಯೇ ಮಗ್ನರಾಗಿರಬೇಕು. ಆ ಒಂದು ಲೋಟ ಹಾಲು ಮಾತ್ರವೇ ಆಹಾರ. ಮಿಕ್ಕಿದ್ದು ಉಪವಾಸದ ಸಮಯ.

ನಿಷ್ಕಾಮಕರ್ಮವಾಗಿ ಪಯೋವ್ರತವನ್ನು ಆಚರಿಸುವುದು ಉತ್ತಮ ಪಕ್ಷ. ಸಕಾಮವಾಗಿ ಆಚರಿಸುವುದು ಮಧ್ಯಮ ಪಕ್ಷ. ಏನೂ ಆಚರಿಸದೆ ನನ್ನ ಹಾಗೆ ಸುಮ್ಮನೆ ಕೂಡುವುದು ಅಧಮಾತಿ ಅಧಮ ಪಕ್ಷ.

ವಿವಿಧ ಸಲ್ಲಾಭಗಳು ಈ ವ್ರತದಿಂದ ದೊರೆಯುವುದಾದರೂ ಅನೇಕರು ಸತ್ಸಂತಾನದ ಬಯಕೆಯಿಂದ ಈ ವ್ರತವನ್ನು ಆಚರಿಸುತ್ತಾರೆ.

ನನ್ನ ತಾಯಿ ವಿಷ್ಣುಪಾರಮ್ಯದ ಕೆಲವು ಕ್ಲಿಷ್ಟವ್ರತಗಳನ್ನು ಆಚರಿಸಿದ್ದಾರೆ. ಒಂದು ಬಾರಿ ವಿಷ್ಣುಪಂಚಕ ವ್ರತ, ಎರಡು ಬಾರಿ ಭೀಷ್ಮಪಂಚಕ ವ್ರತಗಳನ್ನು ಈಗಾಗಲೇ ವಿಧ್ಯುಕ್ತವಾಗಿ ಆಚರಿಸಿ ಮಂಗಳವನ್ನು ಮಾಡಿದ್ದಾರೆ. ಹಾಗೆಯೇ ಎರಡು ಬಾರಿ ಪಯೋವ್ರತವನ್ನೂ ಮಾಡಿದ್ದಾರೆ. ಅವರ ಮಗನಾಗಿ ಇದು ನನಗೆ ಹೆಮ್ಮೆಯನ್ನು ತರುವಂತಹ ವಿಷಯ. (ನಾನೂ ಇವುಗಳನ್ನು ಆಚರಿಸಬೇಕು ಎಂಬ ಯೋಗ್ಯತೆ ಮೀರಿದ ಬಯಕೆಯೇನೋ ನನ್ನಲ್ಲಿ ಮೂಡುತ್ತದೆ. ಆದರೆ ನನ್ನಲ್ಲಿ ತಮೋಗುಣದ ಮೆರೆದಾಟವೇ ಹೆಚ್ಚಾಗಿ ನಡೆಯುತ್ತಿದೆ, ಹಾಗಾಗಿ ಸಧ್ಯಕ್ಕೆ ಅಮ್ಮನ ನೆರಳಿನಲ್ಲಿಯೇ ಒಂದಿಷ್ತು ಜಂಬ ಪಡುವ ಸನ್ನಾಹ ನನ್ನದು!)

ಹಿಂದಿನ ಬಾರಿ ವ್ರತವನ್ನು ಆಚರಿಸಿದ್ದಕ್ಕಿಂತಲೂ ಈ ಬಾರಿ ಅವರ ವ್ರತ ಹೆಚ್ಚು ಅರ್ಥಪೂರ್ಣವಾಗಿತ್ತು. ಶ್ರೀಶುಕಾಚಾರ್ಯರ ಸಂಪೂರ್ಣ ಕೃಪೆಗೆ ಪಾತ್ರರಾಗಿರುವ ಶ್ರೀಸುವಿದ್ಯೇಂದ್ರತೀರ್ಥ ಶ್ರೀಪಾದಂಗಳವರಿಂದ ವ್ರತದ ಅವಧಿಯಲ್ಲಿ ಶ್ರೀವಾಮನ ಪುರಾಣದ ಪ್ರವಚನವು ನಡೆಯಿತು. ಒಂಭತ್ತು ದಿನಗಳ ಕಾಲ ನಡೆದ ಈ ಪವಿತ್ರ ಕಾರ್ಯದಲ್ಲಿ ಅನೇಕ ಮಂದಿ ಸಜ್ಜನರು ವಾಮನಪುರಾಣದ ಕಥಾಮೃತದಲ್ಲಿ ಹರ್ಷದಿಂದ ಮಿಂದೆದ್ದರು. ಶ್ರೀಶ್ರೀಪಾದರಾಜರ ಮಠದ ಆವರಣದಲ್ಲಿ ಈ ಪ್ರವಚನ ನಡೆಯಿತು. ಶ್ರೀಕೇಶವನಿಧಿತೀರ್ಥ ಶ್ರೀಪಾದಂಗಳವರೂ ಈ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಿದ್ದುದು ಈ ವ್ರತದ ಆಚರಣೆಗೆ ಇನ್ನಷ್ತು ಅರ್ಥವನ್ನು ತಂದು ಕೊಟ್ಟಿತು.

ಅಮ್ಮನ ಈ ವ್ರತವು ಶಾಸ್ತ್ರವತ್ತಾಗಿ ನಡೆಯಲು ಬೆನ್ನೆಲುಬಾಗಿ ನಿಂತವರು ಸಾತ್ವಿಕರಾದ ನನ್ನ ಭಾವನವರಾದ ಮುದುಗಲ್ ವೆಂಕಟನರಸಿಂಹ ಆಚಾರ್ಯರು. ಸಂಪ್ರದಾಯ ಪಾಲನೆ, ಪಾಠ ಪ್ರವಚನ ಹಾಗು ಕಟ್ಟುನಿಟ್ಟಿನ ಪೌರೋಹಿತ್ಯಕ್ಕಾಗಿ ಹೆಸರಾಗಿದ್ದಾರೆ. ಅವರು ಒಂದು ಚೂರೂ ಕ್ರಮತಪ್ಪದಂತೆ ಈ ವ್ರತವನ್ನು ಮಾಡಿಸಿದರು. ಇನ್ನುಳಿದಂತೆ ಅಮ್ಮನಿಗೆ ತೊಂದರೆಯಾಗದ ಹಾಗೆ ಅವಳನ್ನು ಮುಚ್ಚಟೆಯಿಂದ ನೋಡಿಕೊಂಡಿದ್ದು ನನ್ನ ಅಕ್ಕ ಸುಧಮ್ಮ! ಹದಿನೈದು ದಿನ ತನ್ನ ನೌಕರಿಗೆ ರಜೆ ಹಾಕಿ ಅಮ್ಮನ ಜೊತೆಗೆ ಇದ್ದು ತನ್ನ ಕರ್ತವ್ಯವನ್ನು ಮಾಡಿದ್ದಾಳೆ. ಇಬ್ಬರಿಗೂ ನಾವು ಋಣಿಗಳು. ಇವರೀರ್ವರ ಚಿರಂಜೀವ ಐತರೇಯ. ಪ್ರವಚನವನ್ನು ತನ್ನ ಫೋನಿನಲ್ಲೂ ಹಾಗು ತನ್ನ ಇನ್ನೊಬ್ಬ ಸೋದರ ಮಾವನಾದ ವಿಜಯನ ವಿಡಿಯೋ ಕ್ಯಾಮೆರಾದಲ್ಲೂ ರೆಕಾರ್ಡು ಮಾಡಿದ್ದಾನೆ. ಚಿಕ್ಕವನಾದರೂ ಹೆಚ್ಚು ಕಿರಿಕಿರಿಯಾಗದಂತೆ ಪ್ರವಚನವನ್ನು ಮುದ್ರಿಸಿಕೊಂಡಿದ್ದಾನೆ. ಅವನಿಗೆ ಶ್ರೀಹರಿವಾಯುಗುರುಗಳು ಜ್ಞಾನ ಹಾಗು ಭಕ್ತಿಯನ್ನು ಕೊಟ್ಟು ಸಲಹಲಿ.

ವಿಜಯನು ತನ್ನ ಹೆಂಡತಿ ರಚನೆಯೊಂದಿಗೆ ಈ ದಿನಗಳಲ್ಲಿ ಬೆಂಗಳೂರಿನಲ್ಲಿ ಇದ್ದು ತನ್ನ ಕೈಲಾದ ಸೇವೆ ಮಾಡಿದ್ದಾನೆ. ಅವರಿಬ್ಬರಿಗೂ ಈ ಪುಣ್ಯದಲ್ಲಿ ಪಾಲು ಉಂಟು. ಅನಿವಾರ್ಯ(?) ಕಾರಣಗಳಿಂದ ನಾನು ಹಾಗು ನನ್ನ ಯಜಮಾನಿತಿಯಾದ ಶಿರೀಷೆಯು ಈ ಕಾರ್ಯಕ್ರಮದಲ್ಲಿ ಯಾವ ರೀತಿಯಿಂದಲೂ ಪಾಲ್ಗೊಳ್ಳಲು ಆಗಿಲ್ಲ. ಐತರೇಯನು ಮುದ್ರಿಸಿಕೊಂಡಿರುವ ಪ್ರವಚನಗಳನ್ನು ನನ್ನ ಯಜಮಾನಿತಿಯು ತಾಂತ್ರಿಕವಾಗಿ ಸ್ವಲ್ಪ ಸಂಸ್ಕರಿಸಿ ಕೊಟ್ಟಿದ್ದಾಳೆ. ಅವುಗಳನ್ನೇ ಇಲ್ಲಿ ಡೌನ್ ಲೋಡ್ ಮಾಡಲಿಕ್ಕೆ ಕೊಟ್ಟಿರುವುದು. ಹೀಗಾಗಿ ಅವಳೂ ಸಹ ಒಂದಿಷ್ಟು ಪುಣ್ಯಭಾಗಿ.

ಮಂಗಳವು ಮುಗಿದ ನಂತರ ಹೋಗಿ ಅಮ್ಮನನ್ನು ಮಾತನಾಡಿಸಿ ಅವಳು ಮಾಡಿದ ಹದವಾದ ಅಡುಗೆಯನ್ನು ಹೊಟ್ಟೆ ತುಂಬಾ ತಿಂದು ರೈಲಿನಲ್ಲಿ ನಿದ್ದೆ ಮಾಡುತ್ತಾ ವಾಪಸ್ಸು ಬಂದಿದ್ದೇ ನನ್ನ ಸಾಧನೆ.

ನಮ್ಮ ಮನೆಯ ಬಗ್ಗೆ ಅನ್ಯಥಾ ಕೊಚ್ಚಿಕೊಳ್ಳುತ್ತಿದ್ದೇನೆ ಎಂದು ದಯವಿಟ್ಟು ಭಾವಿಸದಿರಿ. ಕಾರ್ಯಕ್ರಮ ಸುಗಮವಾಗಿ ನಡೆಸಲು ಕಾರಣರಾದ ವ್ಯಕ್ತಿಗಳಿಗೆ ಅಭಾರಮನ್ನಣೆ ಮಾಡುವುದು ಶ್ರೇಯಸ್ಕರವಲ್ಲವೇ? ಹಾಗಾಗಿ ಇದನ್ನೆಲ್ಲ ಹೇಳಿದ್ದೇನೆ.

ಶ್ರೀಸುವಿದ್ಯೇಂದ್ರತೀರ್ಥ ಶ್ರೀಪಾದಂಗಳವರ ನಿರರ್ಗಳ ವಾಗ್ಝರಿಯ ಬಗ್ಗೆ ನಾನೇನು ವರ್ಣಿಸಬಲ್ಲೆ? ಅಷ್ಟು ಶಬ್ದಗಳಾದರೂ ನನ್ನಲ್ಲಿ ಎಲ್ಲಿವೆ?. ಅವರು ಮೇರುಸದೃಶರು. ನಾನು ಅದರ ಪದತಲದಲ್ಲಿರುವ ಚಿಕ್ಕ ಮಣ್ಣಕಣ. ಅಷ್ಟು ದೊಡ್ಡವರು ನಮ್ಮಮನೆಯಲ್ಲಿ ಪ್ರವಚನ ಮಾಡಿದರು ಎನ್ನುವುದೇ ನನಗೆ ರೋಮಾಂಚನವಾಗುವ ಸಂಗತಿ. ಅವರ ಬಗ್ಗೆ ನಾನು ವಿವರಣೆ ಕೊಡುತ್ತೇನೆ ಎಂದರೆ ಅದು ಅವಿವೇಕವಾದೀತು. ನಾನು ಏನೇನೋ ಮಾತನಾಡುವುದೂ ಬೇಡ, ನೀವು ಅವುಗಳನ್ನು ಕೇಳಿ ಬೇಸರಿಸಿಕೊಳ್ಳುವುದೂ ಬೇಡ. ಪ್ರವಚನಗಳನ್ನು ಡೌನ್ ಲೋಡ್ ಮಾಡಿಕೊಳ್ಳಿರಿ, ಅಪರೂಪದ ಅನೇಕ ಸಂಗತಿಗಳನ್ನು ತಿಳಿದುಕೊಳ್ಳಿರಿ.